ROXAS CITY, CAPIZ- Nangin madinalag-on ang ginpatigayon nga ‘Krusada Kontra Korapsyon’ motorcade rally sa probinsya sang Capiz kadungan sang Trillion Peso March suno sa pamunuan sang isa ka grupo nga nagpakigbahin sa amo nga lihok.
Sa interview sang Bombo Radyo kay Pastor Russel Ban, Founder sang Brotherhood of Capiz Riders, iya ginpahayag nga yara sa kapin 100 ka mga indibidwal ang nag-upod sa amo nga aktibidad.
Suno kay Ban, nalipay ang tagsa ka mga nagpakigbahin bangud nga kaangay bugtaw ang mga Capizeño sa nagakahinabo nga pagpinangawat sa kaban sang mga pumuluyo ang mga opisyal sang gobyerno sang pungsod.
Dugang pa nya, apisar nga gamay lang ang nagpatigayon sang hublag-protesta sa probinsya, isa na ini ka dako nga butang sang pagpakita sa mga makawat nga opisyal nga ang tawo indi buta kag bungol sa nagakatabo.
Pahayag pa sang natungdan, kuntani nga mapamatian sang mga opisyal sang gobyerno ang tagsa ka mga panawagan sang mga pumuluyo nga untaton na ang korapsyon kag magpangalagad sa tawo sang tampad kag sinsero nga pagpanerbisyo.
Nagalaum si Pastor Ban nga mgapadayon ang pagpanindugan sang mga tawo sa pagtapna kag pagpamatok sa korapsyon sa pungsod.
Interviewed by Bombo Sunnie Mae Constantino Batencila
