ROXAS CITY – Bukas sa tagipusuon nga ginpakigbahin ni Mr. Richard Llanera, ang iya istorya sa kabuhi antes nalab-ot ang iya nga handum.
Si Llanera ang nagradwar sa kurso nga Bachelor of Science in Secondary Education Major in Physical Education and Music sa Capiz State University Burias Campus kag tumandok sang banwa sang Tapaz.
Sa interview sang Bombo Radyo kay Llanera, ginsiling sini nga sa iya paggradwar indi nangin madali ang iya kabuhi bangud madamo nga mga pagtilaw ang iya naagyan rason nga pila pa ka mga trabaho ang iya nasudlan.
Una nangin isa siya ka waiter sa isa ka hotel, nangin volunteer teacher, nangin miyembro man sang Bureau of Jail Management and Penology, caregiver sa Taiwan, kag nangin empleyado sang bangko.
Sa pihak sini tanan, nangin inspirasyon niya suno diri ang iya pamilya ilabi na ang iya iloy bangud indi niya luyag nga ma-eksperyensyahan ang kabuhi nga ila nadak-an bangud suno kay Llanera daw kaangay nga indi niya matakuran nga magkuyakod sa uma rason nga nagtimakas ini sang maayo.
Matapos ang pila ka tuig nga pagsaylo-saylo sang trabaho, nagbakas siya agud makapadulong sa Canada kag nagpasimpalad nga mag-apply bilang isa ka manunudlo kag sa paglaum nga makasulod kag makabulig sa iya pamilya.
Suno kay Llanera makaligad lamang ang 8 ka bulan, maswerte nga nabaton siya sa isa ka highschool nga buluthuan kung sa diin tubtob sa karun didto na siya nagatudlo.
Ginpakigbahin man sini nga parehas lamang ang mga strategy sang buluthuan sa Canada kag diri sa Pilipinas, apang ang kinalain lang suno sa iya ginahatag sang gobyerno ang tanan nga mga galamiton kag kinahanglanonsang manunudlo.
Dugang pa ni Llanera, indi mabakal ang kabuhi sang isa ka manunudlo sang anu man ka dako nga balor sang kwarta, bangud sa ila pagpursegi nga makatudlo sa mga estudyante.
Pahayag sini sa tanan nga mga estudyante, kinahanglan nga may back up plan sa tanan nga mga plano sa kabuhi, determinado kag indi madulaan sang paglaum.
