ROXAS CITY – Indi sa gihapon makapati ang isa ka Capizeño nga nangin Top 1 ini sa September 2019 Medical Technologist Licensure Examination.
Sa exclusive interview sang Bombo Radyo kay Reiven John Bernales sang Panay, Capiz, ginpahayag sini nga indi ini makapati kag indi masudlan ang kalipay nga iya nabatyagan sang nakita sini ang resulta sang nasambit nga pasinawaan.
Matapos nga makumpirma nga siya gid man ang nagpanguna sa 6 mil 453 ka mga nakapasar sa pasinawan sa bilog nga Pilipinas, naghibi ini sa tuman nga kalipay kag ginpasalamatan ang Diyos nga amo ang nangin alagyan sang iya kadalag-an.
Ginpasalamatan man sini ang iya ginikanan nga naghatag sang bug-os nga suporta sa iya.
Aminado man si Bernales nga indi nangin madali ang iya inagihan agud lamang malab-ot ang iya ginapahamtangan sa karon.
Mahibaluan nga ang kurso nga Medical Technology ang ginkuha lamang sini matapos nga wala ini makapasar sa entrance exam sang isa ka unibersidad sa syudad sang Iloilo.
Indi naman bag-o sa iya ang pagtulun-an, bangud pila sa mga malapit nga himata sini ang yara man sa medical profession nga isa man sa mga nag-impluwensiya sa iya agud magkuha sang kurso nga medical technology.
Aminado si Bernales nga ang makapasar lamang sa nasambit nga pasinawan ang nangin unod sang iya pangamuyo kag wala magdahom-dahom nga siya ang magapanguna diri.
Sa karon plano ni Bernales nga magtrabaho agud ma-practice ang iya propesyon kag kun makatipon na luyag sini nga padayunon ang pagkuha sang medisina.
