ROXAS CITY – Dako ang paglaum ni Maria Kydlee Torato nga tumandok sang Barangay Cagay, sining syudad nga pagahatagan ini sang suporta indi lamang sang Capiznon kundi subong man sang tanan ang iya pagahimuon nga short film sa probinsya.
Sa interview sang Bombo Radyo kay Torato, ginpahayag sini nga nagsugod siya nga magpasimpalad sa amu nga patag sadtong bulan sang Marso sa diin nakuha ini bilang Top 30, kag ginsundan pa ini kag nakakuha sang Top 10 kag ang katapusan ang subong nga ginsulat sini nga may tig-ulo “Bisan Abo, Wala Bilin” sa Top 2 kag gintan-ayan sang P500,000 nga pondo.
Suno kay Torato, wala ini niya gina-ekspektar nga makasulod sa amu nga pasinawan bangud nahibaluan sini nga ang tanan nga nagapasakop diri sagad na kag madamo na sang mga na-eksperyensyahan kag hibalo.
Mahibaluan nga sa bulan sang Agusto kag una nga semana sang Setyembre plano sini niya nga magasugod sa pagshooting kag diri pagahiwaton sa probinsya sang Capiz.
Nagalaum man ini nga antes paman matapos ang tuig, matapos na ang amu nga short film kag malantaw na sang tanan.
Sa nasambit nga short film, nagakinahanglan sila suno diri sang 20 tubtob 30 ka mga indibidwal nga mangin parti sang ila pelikula.
Ginpakigbahin man ni Torato nga ba-se sa iya natun-an indi mahupos ang pagdirek sa isa ka short film bangud nagakinahanglan ini sang malawig nga pagpasensya kag maayo nga relasyon sa imu mga kaupdanan.
