ROXAS CITY – Nagbunga ang handum sang mga artistic directors sang CAPA Dance Company nga makilala ang Capiz sa iban nga dumuluong nga pungsod sa patag sang ballet dance.
Ini matapos nag-angkon sang nanari-sari nga awards ang ballerinas kag danseurs sang CAPA Dance Company sa ginhiwat nga Cambodia Dance challenge, online dance competition, sang nagligad nga bulan sang Hulyo.
Sa interview sang Bombo Radyo sa artistic director sang amu nga dance company nga si Eliza Mae Capa, ginpahayag sini nga malipayon man sila nga nakahatag sang bugal para sa probinsya, pinaagi sa ila ginpakigbahin nga talento.
Nangin kasumpong sang mga ini ang nagkalain-lain nga ballet dancers sang nanari-sari nga ballet schools sa Manila, Malaysia, Singapore, Thailand kag Japan.
Nahibaluan nga 8 na katuig sumugod sang gintukod ang amu nga dance academy kag sa karon may yara naman sila sang mga scholars.
Suno sa pila nila ka estudyante nga nakahatag sang self-confidence, discipline kag time management ang pagsulod nila sa amu nga akademya kag bulig sa ila pagtuon.
Panginbulahan sa mga ballerinas kag danseurs nga sanday:
1. Sophia Estelle Tolentino – nakakuha sang Platinum kag Top Scorer award sa Junior Group B Solo Classical Ballet
2. Leanne Ellise Capa – nakakuha sang Platinum kag Top Scorer award sa Mini Group B Solo Classical Ballet, Contemporary, Lyrical kag Jazz
3. Kelly Gabrielle Divinagracia – nakakuha sang Platinum award sa Senior Solo Classical Ballet
4. Jeric Jimenez kag John Airon Gerano – nakakuha sang diamond kag best duo dance sa Senior Duo/Trio Category
Nakakuha man ang CAPA Dance Academy sang outstanding school award.
Nahibaluan nga ini na ang ika-tatlo nga pagpakigbahin sang dance company sa pangkalibutanon nga kompetisyon.
Nagpasalamat man si Capa sa mga ginikanan nga padayon nga nagasuporta sa huyog sang ila mga kabataan.
