ROXAS CITY – Wala gin-ekspektar sang isa ka Capiznon dancer, nga ini ang mangin kampeon sa indi lamang isa, kundi tatlo ka kategorya sa nagtakup nga Asia Cup 2022 Taipei Open Championship Online Dancesport Competition.
Sa interview sang Bombo Radyo kay Mary Chelleen Faith Baylon, estudyante sang Capiz National High School, kag taga syudad sang Roxas, suno diri nga wala ini naglaum nga mangin kampeon bangud sa semana lamang nga preparasyon sa amu nga kompetisyon.
Dako man ang iya pagpasalamat sa MB Dance Academy nga naba-se sa Iloilo, sa pagbulig nga mapaguwa pa ang iya talento.
Nakuha ni Baylon ang kampeonato sa Cha-Samba-Rumba-Jive (CSRJ) Open Solo Under 16, Cha cha cha Open Solo Under 16 kag Jive Open Solo Under 16, kun sa diin nangin kasumpong sini ang mga pungsod sang Taiwan kag Singapore.
Mensahe sang young Capiznon dancer sa mga kabataan nga may huyog sa pagsaot, nga padayon lang sa imo pasyon, bangud sa ulihi, magabunga ang tanan nga imo sakripisyo.
