ROXAS CITY – Ginpakigbahin sang isa ka Capiznon ang iya nga eksperyensiya sa pagpadulong sa 81 ka mga probinsya sa pungsod Pilipinas.
Sa interview sang Bombo Radyo kay Ms. Gaycebel Delos Santos sang Roxas City nga nagatrabaho bilang Legislative Officer sang Provincial Government, suno diri nga inspirasyon sini nga liboton ang Pilipinas sumugod sang nagtatak sa iya ang kanta nga campaign jingle sang Department of Tourism nga “Pilipinas, Tara na, Biyahe tayo!” sang 2004.
Sumugod sadto, nangin interesado ini nga tukibon ang manggad sang Pilipinas pinaagi sa pagpanglugayawon.
Gani, sa edad nga 30-anyos, 81 na sa karon ang iya napadulongan nga probinsya humalin sa Batanes tubtob Tawi-tawi.
Ginpahayag sini nga sa tanan nga mga lugar, ang probinsya sang Batanes ang isa sa mga nagkuha sang iya atensyon, bangud sa kanami sang palibot nga daw sa iban ka lang nga pungsod; sa ila kaugalingon nga kustombre kaangay sang ‘honesty store’ kag halos wala sang krimen nga nakasiling nalang ini nga kuntani kaangay nalang sang Batanes ang bug-os nga Pilipinas.
Una nga ginpadulongan nga Rehiyon ni Delos Santos amu siyempre ang mga probinsya sa Western Visayas kag ang katapusan amu ang Samar kun sa diin, tuman ang iya kalipay.
Temporaryo ini nga nag-untat sa panglugayawon sang naglupok ang COVID-19 pandemic apang matapos ang duha ka tuig, balik liwat ini sa iya huyog – ang pagbiyahe.
Apang, ginklaro sang Solo backpacker sang Capiz nga ginahimo niya ang pag-travel sa tion sang long weekends ukon sa holiday, gani masiling sini nga wala ini nagapabaya sa iya trabaho.
Masiling man sini nga “Truly, Philippines is no like other.”
