ROXAS CITY – Bugal kag kalipay ang nabatyagan sang isa ka tumandok sang Agtatacay Sur, sa banwa sang Sapian, matapos nga ini ang napilian bilang bida sa isa ka Indie film nga “In Heaven’s eye.”
Sa interview sang Bombo Radyo kay Mr. Rene Ortinez, ginpakigbahin sini ang mga pagtilaw nga nalampuwasan agud malab-ot ang childhood dream nga mangin ‘artista’.
Suno diri, kanami sa pamatyagan nga ang iya ginhandum sang bata pa, ang nangin matuod pinaagi sa iya determinasyon kag pakigsapalaran.
Suno pa diri, isa sa pagpanghangkat sa iya amu ang pagtagalog, bangud may tono ini nga Hiligaynon, apang sa baylo nga maluyahan, ginakadlawan kag ginatadlong nalang sini ang amu nga sala’.
Antes paman nangin leading actor si Ortinez sa ‘In Heaven’s eye’ nangin supporting actor man ini sa nauna nga mga Indie film nga iya ginpasakupan kag nagtinguha nga makuha ang leading role.
Nahibaluan nga nagkuha sang kurso nga BSHRM si Ortinez kag nagpasakup sa mga Theater play sa isa ka pribado nga unibersidad sa Roxas City, apang didto na sa syudad sang Manila nagtrabaho matapos ini makagradwar.
Ang ini nga short film ni Harold Jay Silla, ang malantaw sa mga pili nga sinehan sa Pungsod, subong nga tuig.
