Nagpakigbahin ang Capiznon nga OFW nga na-repatriate gikan sa Middle East sang iya nga mga naagyan.
Sa interview sang Bombo Radyo kay Maricel Arboleda, isa ka domestic helper sa Kuwait, iya ginpahayag nga lakip siya sa 2nd Batch sang mga Overseas Filipino Workers nga natigayon nga ma-repatriate kag makapauli sa Pilipinas sa bulig sang Philippine Embassy sa Kuwait kag Overseas Workers Welfare Administration ukon OWWA.
Suno kay Arboleda, madamu siya nga kaupod nga mga Filipino nga narepatriate gikan sa nagkalain-lain nga bahin sang Pilipinas kaangay sang Cotabato, Mindanao, Cebu, Manila kag iban pa nga bahin sang Luzon.
Pahayag pa niya, gin-atipan gid sila sang maayo sang Embahada sang Pilipinas sa Kuwait halin sang gin-rescue sila kag nag-abot na sa Pilipinas.
Dugang pa niya, nga naglab-ot sa apat ka adlaw ang ila nga byahe halin sa Kuwait pakadto sa Riyadh, Saudi Arabia, kon sa diin amo na lang ini ang may bukas nga airport nga magbyahe padulong sa Pilipinas.
Apisar nga wala niya matapos ang iya nga kontrata bangud sa tensyon nagpasalamat man ini nga luwas siya nga nakapauli sa iya nga pamilya.
