Isa ka Capiznon nurse ang nakahatag sang kadungganan sa Pilipinas matapos mangin labing-una nga Pilipino nga ginpahamtang bilang Group Magnet Program Director sang Saudi German Health, isa sa mga pinakadaku nga hospital groups sa Middle East.
Sa interview sang Bombo Radyo kay Rafael Villademosa Collado, tumandok sang Roxas City , iya ginpahayag nga daku nga oportunidad kag responsibilidad para sa iya ang pagpamuno sa pagpatuman sang Magnet Program, nga ginakilala bilang isa sa pinakamataas nga basehan sang nursing excellence.
Suno kay Collado, matapos ini nga makapasar sa Philippine Nursing Licensure Examination sang 2009, nagtrabaho anay ini sa Pilipinas antes nagdesisyon nga magpadulong sa Saudi Arabia sang 2012 bilang operating room nurse.
Pahayag pa ni Collado, ang iya dedikasyon kag pagpaninguha sa trabaho ang nangin dalan sa iya madasig nga pag-uswag sa patag sang healthcare leadership.
Nagserbe man ini bilang Acting Chief Nursing Officer kag nangin labing-una nga lalaki nga Pilipino nga nagpamuno sa nursing organization sang Saudi German Hospital Jeddah.
Sa idalom sang iya pagpamuno, nangin labing-una nga ospital sa guwa sang Estados Unidos ang Saudi German Hospital Jeddah nga ginpasidunggan sang Magnet with Distinction sang American Nurses Credentialing Center ukon ANCC, nga isa sa pinakamataas nga pagkilala sa nursing excellence.
Dugang pa sang natungdan, ang iya nga kadalag-an indi lamang para sa iya kaugalingon kundi isa man ini ka inspirasyon sa mga Pilipino nga nurse kag mga Filipino healthcare professionals sa pangkalibutanon nga patag sang nursing.
