ROXAS CITY – Nakakuha sang golden diploma sa World Choir Games ang hubon sang Capsu Chorale nga ginpatigayon sa pungsod sang South Korea.
Sa interview sang Bombo Radyo kay Dr. Amel L. Magallanes Chairman External Affairs and Linkages – CAPSU Main ginsiling sini nga tuman ang ila kasadya matapos mahibaluan nga sila ang nakakuha sang bulawan nga diploma.
Bangud diri, indi lang suno diri ang pangalan sang unibersidad ang ila ginapabugal kundi subong man ang bug-os nga probinsya sang Capiz.
Suno kay Magallanes, ini ang ila una nga kahigayunan nga nagpakigbahin sa mga international competion.
Antes paman ang nasambit nga pa-indis-indis naglab-ot suno diri sa isa ka tuig ang ila pagpreparar kag madamo man sila sang mga na-agyan ilabi na nga may klase ang kada miyembre.
Apang sa pihak sini, wala nila ini duno diri ginhimo nga rason agud mag-untat sa training sa baylo nagtalana sila sang oras agud tanan ang makatambong.
Bilang Chairman indi suno diri nangin madali ang tanan ilabi na nga sa 7 ka mga pungsod nga ila nakontra, kadam-an sa mga ini ang sagad na kag pagpangamuyo kag pagsalig lamang suno diri ang ila nangin bala agud makuha ang golden diploma sa category IV.
Sa karun, masunod naman nila nga ginapreparahan ang category V kung sa diin pagahiwaton sa Hulyo 11.
Nagpalab-ot man ini sang pagpasalamat sa lokal nga gobyerno nga Capiz bangud sa wala untat nga pagsuporta nga ginahatag sa ila.
Sa kabug-usan may yara sang 25 nga mga participants ang nasambit nga grupo kung sa diin tanan sa mga ini nagradwar sa amu nga unibersidad.
