Gin-athag sang pamunuan sang Capiz State University (CAPSU) nga wala ini nagapangatubang sang shortage sang slots sa school year 2026-2027 kundi may capacity limitation bangud sang padayon nga pagsaka sang demand sa higher education.
Sa interview sang Bombo Radyo kay Atty. Jaybe L. Blancaflor, Information Officer III sang CAPSU Public Information Office, iya ginpahayag nga indi mahimo nga batunon sang unibersidad ang tanan nga aplikante kun lampas na ini sa kapasidad sang eskwelahan bangud mahimo ini makaapekto sa kalidad sang pagtuon sang mga estudyante.
Suno kay Blancaflor, nagataas ang demand sang mga naga-apply sa kolehiyo bangud man sang pagdamo sang populasyon kag mas mataas nga interest sang mga kabataan nga magasulod sa mga kolehiyo kag unibersidad.
Bangud sa limitado nga kapasidad sang mga classroom kag iban pa nga pasilidad, ginadumalahan sang CAPSU ang admission process sang patas, responsable kag organisado nga pamaagi.
Dugang pa Blancaflor, ginapatuman sang unibersidad ang mga admission policies agud masiguro nga mapadayon ang dekalidad nga edukasyon para sa mga estudyante nga makasulod sa CAPSU.
