Ginpakigbahin sang apat ka mga CAPSU Pilar SWLE Passers, ang ila nagkalain-lain nga mga na-eksperyensyahan sang tion nga yara sila sa proseso sa pagkuha sang board exam.
Sa interview sang Bombo Radyo kanday Bacalocos, Liza; Bacay, Cez Marie; Bactol Winny; kag Delamide Kessie ginsiling sang mga ini nga lain-lain man ang ila nangin lakat sa sini nga pagtilaw isa lamang ang ila ginsaligan kag ginpatihan amu ang pagpangamuyo kag wala pagkalipat nga magpalapit sa Mahal nga Maka-ako.
Suno sa mga SWLE Passers, diin man kag anu man ang padulungan ukon pagahimuon siguraduhon nga ginatugyan ang tanan sa iya.
Pahayag pa sang mga ini nga indi basta-basta ang ila na-eksperyensyahan sa amu nga tion apang bangud sa ginahatag nga suporta sang ila tagsa ka mga pamilya, kakilala, abyan, mga manunudlo kag nagasalig sa ila ginhatag nila suno diri ang tanan nga ila kutob masarangan.
Indi man suno sa ila madula ang mga problema kag pagtilaw nga naga-abot apang nagapati ang mga ini nga tanan nga nagakatabo may yara sang ginapreparar ukon maayo nga kabaylo.
Pahanumdum sang mga ini sa mga estudyante nga hatagan sang importansya ang edukasyon bangud isa ini sa makabulig agud mangin madinalag-on sa kabuhi kag indi tanan nga mga kabataan may kahigayunan nga mapa-eskwela.
Matandaan nga nakakuha sang 100% nga percentage ang tanan nga mga first taker sang Capiz State University Pilar Campus.
