Gindepensahan sang Catholic Bishops’ Conference of the Philippines (CBCP) si Cardinal Luis Antonio Tagle bangud sa mga kritisismo batok sa iya angut sa isyu sang clergy sexual abuse, pila ka adlaw antes ang conclave sa Vatican agud magpili sang bag-o nga Santo Papa.
Sa isa ka pahayag nga ginpaguwa sang Mayo 2, ang CBCP nagpamatuod nga si Tagle wala na sang direkta nga awtoridad sa bisan sin-o nga mga obispo sang diosesis sa Pilipinas sugod sang ginbutang sia sa isa ka posisyon sa Roman Curia. Suno sa ila, ang pagsabat sa mga kaso sang pag-abuso amo ang responsibilidad sang lokal nga mga obispo ukon relihioso nga mga superyor.
Ginsambit man sang CBCP nga nagbulig si Tagle sa paghimo sang pastoral guidelines batok sa sekswal nga pagpang-abuso sang tuig 2003. Apang, suno sa watchdog group nga Bishop Accountability Oraganization, ginasiling nga indi ini makita sa website sang CBCP ukon sang Archdiocese of Manila.
Ginpakamala-ot sang co-director sang grupo nga si Anne Barrett Doyle si Tagle kag isa pa ka papal frontrunner nga si Cardinal Pietro Parolin, nga indi masaligan sa pagpugong sang mga pag-abuso sa simbahan. Gintawag pa gani ni Doyle si Parolin nga “bug-os nga manugtipig sang sekreto.”
Samtang pagahiwaton naman ang papal conclave sa Mayo 7 sa pagpili sang magabulos kay Pope Francis nga nagtaliwan sa edad nga 88 isa ka bulan na ang nakaligad. Sanday Tagle kag Parolin ang pila sa ginakabig nga pinakamabaskog nga kandidato nga mangin lider sang simbahan Katoliko.
