ROXAS CITY – Multiple gunshot wound ang naangkon sang caretaker sa duta matapos tiruhon sang wala pa makilala nga mga suspek.
Duguon ang bilog nga lawas sang biktima nga si Ricardo Refil sang Masbate sang makita sa tunga sang karsada sa Sitio proper, Barangay West Villafores, Maayon, Capiz.
Sa inisyal nga imbestigasyon sang Maayon PNP, antes ang krimen nag-inuman pa ang biktima kaupod ang hinablos kag abyan bilang selebrasyon sa iya nga kaadlawan.
Pagkagab-i nakabati sang asud asod nga lupok ang mga residente, apang ginbalewala lamang nila.
Pagka-aga nakita sang mga nagaagi sa karsada ang bangkay ni Refil.
Narekober sang mga pulis sa ginluntaran sang krimen ang 12 ka empty shell sang .45 caliber pistol kag tatlo nga slug.
Nagapadayun ang imbestigasyon sang pulisya agud matumod ang mga responsable sa krimen.
Samtang ginpaidalum na sa post mortem examination ang bangkay sang biktima.
