ROXAS CITY, CAPIZ – Wala na sang kabuhi kag yara na sa advanced state of decomposition ang 42-anyos nga caretaker sang masapwan ini sa sulod sang iya kwarto sa balay nga iya ginabantayan sa isa ka subdivision sa Barangay Cagay, Roxas City.
Ang biktima amo si alyas Junjie, residente sang Barangay San Jose sini nga syudad.
Sa interview sang Bombo Radyo Roxas kay Barangay Kagawad Isidro Aragon, iya ginpahayag nga sang Dominggo sang gab-i ulihi nga nagpauli si Junjie para magpanyapon sa ila nga balay sa Brgy. San Jose antes nagbalik sa iya nga trabaho sa Barangay Cagay.
Pagkasunod nga adlaw sang Lunes, natalupangdan sang pamilya nga wala na nagasabat si Junjie sa mga tawag kag message, rason nga ginpadulungan ini sang iya iloy sa balay nga iya ginabantayan. Didto kag nasapwan nga wala na sang kabuhi ang biktima sa sulod sang iya nga kwarto.
Nagapati naman ang pamilya nga wala sang foul play sa natabo sa biktima bangud ila gintuad nga may ginasupreher na nga daan ini nga balatian.
Padayon naman ang imbestigasyon sang mga otoridad angut sa nasambit nga insidente.
– Interviewed by: Bombo Jessa Mae Siman De Los Santos
