Patay ang 55-anyos nga caretaker sa punong matapos ginsumbag sang kaupod nga caretaker kag aksidente nga nagtupa ang ulo sa matig-a nga bagay sa Sitio San Isidro, Barangay Cagay, sining syudad.
Ginkilala ang biktima nga si Remy Catalan sang Barangay Dulangan, Pilar, Capiz samtang ang suspek nga ginatudlo responsable sa kamatayon sang biktima amo si Arjun Bunda alyas Nonoy 19-anyos sang Barangay Jamul-awon, Panay.
Ginpahayag ni Punong Barangay Arturo Aragon nga ba-se sa ila nga pagpangusisa nga nagaluto ang duha sang manok nga ila i-sumsuman sa pag-inum sang nagbuhi sang indi maayo nga tinaga ang suspek.
Posible ginkaakig ini sang biktima rason para iya sumbagon ang suspek.
Apang nagbalos si Bunda kag iya ginsumbag si Catalan nga naigo sa sag-ang.
Bangud sa impact sang pagkasumbag sa biktima, natumba ini kag posible naigo ang iya ulo sa matig-a nga bagay.
Gilayon nga gindala sa ospital si Catalan, apang gindeklara ini nga dead on arrival sang doktor.
Samtang wala nagpalagyo ang suspek kag gindala ini sa Roxas City PNP sa diin ini karon nakabilanggo.
