Posible nga magapatubang sang kaso nga reckless imprudence resulting in homicide ang caretaker sang isa ka balay matapos ginalegar nga nakuryente ang isa ka menor de edad nga babaye sa live wire nga yara sa kudal nga nagresulta sang kamatayon sini sa Barangay Dumulog, Roxas City.
Ang biktima amo si alyas “Angel”, residente sang New Road, Banica, Roxas City.
Sa interview sang Bombo Radyo Roxas kay Police Lieutenant Colonel Rogelio Tomagtang Jr., hepe sang Roxas Component City Police Station, iya ginpahayag nga posible nga mapasakaan sang kaso ang caretaker kun mapamatud-an nga may kapabayaan ukon responsibilidad ini sa natabo nga insidente.
Suno pa kay Tomagtang Jr., nakuha na ang live wire sa lugar sa pagpanguna ni Former Punong Barangay Richard Mario Artillero matapos nga naistorya ang caretaker sang resthouse.
Sa subong, nagapadayon ang imbestigasyon sang kapulisan, kag magapatigayon man sang mga intervention sa lugar agud malikawan ang kaangay nga insidente.
