Nasunog kag nagtuga sang mga paglupok ang barko nga may bandera sang Singapore nga Wan Hai 503 samtang nagapadulong sa Mumbai, nga nagtuga sang pagkahulog sang 40 ka mga suludlan sa Arabian Sea kag ang pila ka mga tripulante naglumpat sa dagat agud makapalagyo.
Suno kay Shekhar Kuriakose sang Kerala State Disaster Management Authority, natabo ang insidente mga 144 kilometros gikan sa baybayon sang Kerala, India.
Suno sa una nga impormasyon may 22 ka mga trabahador nga sakay sang barko 18 ang naglumpat sa baybayon kag yara sa mga rescue boat kag gintinguhaan pa nga maluwas sila.
Sa mga laragway nga ginpaambit sang Indian Coast Guard sa social media platform X (Twitter anay) nagapakita sang madamol nga aso gikan sa barko kag mga nasunog nga mga suludlan malapit sa ginhalinan sang sunog.
Suno sa defense ministry, nagakalayo kag nagalutaw sa kadagatan ang amo nga barko.
Wala pa gin-anunsyo kon ano nga sahi sang kargamento ang dala sang mga container, kag nagapadayon ang imbestigasyon sa gintunaan sang mga paglupok.
Isa man ka container vessel ang naglugdang sa amo man nga rehiyon sang tinalikdan nga bulan rason nga nagkalahulog sa dagat ang 100 ka containers, apisar nga wala sang ginreport nga oil spill.
