Isa ka barko nga may bandera sang Liberia nga may dala nga makatalagam nga mga kemikal ang naglugdang sa kadagatan malapit sa Kerala, India, suno sa report sang Indian Navy kahapon nga adlaw, Domingo.
Sakay sang nasambit nga barko ang 24 ka mga crew members gikan sa nagkalain-lain nga pungsod lakip na ang Georgia, Russia, Ukraine, kag Pilipinas, nga luwas nga na-rescue sang mga otoridad.
Nahibaluan nga ang cargo ship ukon MSC ELSA 3 nga nagalaba sang 184 metros ang nagbiyahe gikan sa Vizhinjam padulong sa Kochi sang nagpadala ini sang distress signal sadtong Sabado.
Ang barko nasapwan sang eroplano sang Indian Navy 38 nautical miles southwest sang Kochi, nga ginapahayag nagalutaw sa isa ka makatalagam nga posisyon.
Sa isa ka pahayag, ang Indian Ministry of Defense nagsiling nga 640 ka mga suludlan ang sakay sa barko, lakip ang 13 ka makatalagam nga mga suludlan kag 12 pa nga may unod nga calcium carbide — isa ka kemikal nga ginagamit sa paghimo sang abono kag asero.
May karga man nga 370 ka tonelada sang langis kag gatong ang nalunod nga barko, apang suno sa coast guard, wala pa sang narecord nga oil spill sa lugar.
Samtang, ang Indian Coast Guard handa para sa posible nga sabat sa polusyon batok sa pamahog sang pag-ula sang langis sa kadagatan sa higad sang Kerala.
