ROXAS CITY – Surprised kag proud ang bug-os nga Capiz State University (CAPSU) College of Engineering and Architecture Department matapos nga nangin topnotcher ang duwa nila ka estudyante sa ginpatigayon nga Registered Master Electrician (RME) Licensure Examination sang Abril 2022.
Nakuha ni Rodriner Casugbo Billones ang una nga pwesto ukon Top 1 nga may 93% kag Queenstant Dianne Jean Bayaban Banico ang Top 10 nga may 87% nga rating score.
Sa interview sang Bombo Radyo kay Engr. Joel Villaruz, College Dean sang Engineering and Architecture ginpahayag sini nga ba-se sa polisiya sang bulothuan magabaton sang P100,000 cash ang Top 1 kag P50,000 naman sa Top 10 sa martes nga adlaw.
Suno diri, dako ang nangin paghangkat nga naekperensyahan sang mga estudyante bangud tuman nga kadamo ang coverage sang examination kag may pila ka mga pagbag-o sa mga equations sa curriculum sang PRC.
Dugang pa sini, nga dako nga kadungganan sang eskwelahan ang kadalag-an sang ila mga estudyante ukon produkto. Mahibaluan nga 7 ang passers sa Registered Master Electrician nga may passing rate nga 50% kag 13 naman sa Registered Electrical Engineering nga may 56.52%.
Ginpahayag man ni Villaruz nga indi ini ang una nga kahigayunan bangud sang nanliligad nga mga tuig nakapagkit ang CAPSU sang Top 1, 6 kag 8 sa amo man nga examination.
Padayon ang pagsuporta sang boluthuan sa mga estudyante nga magakuha sang board examinations kag handa ang mga manunudlo sang CAPSU nga mag-ubay sa mga estudyante kun ano man ang luyag nila nga maabot.
