Gina-engganyo sang Catholic Bishops’ Conference of the Philippines (CBCP) ang mga tumuluo nga ikabuhi ang “digital fasting” bilang kabahin sang ila pagpamalandong subong nga kwaresma.
Sa pastoral nga sulat nga may tig-ulo nga “Fasting Beyond Food: Inviting Christ into Digital Media Use,” ang CBCP nagsiling nga ang Kwaresma, nga magasugod sa Pebrero 18, isa ka tion sang liwat nga pagpalapit sa Dios paagi sa pagpangamuyo, pagpuasa, kag mga buhat sang kaluoy.
Suno sa mga obispo, magluwas sa pagkaon, mahimo man magpuasa ang isa gikan sa sobra nga paggamit sang cellphone, social media, streaming, kag online games nga nagaganyat sang atensyon kag nagaapekto sa sulod nga kabuhi.
Gin-athag nila nga indi ini batok sa teknolohiya, kundi isa ka imbitasyon nga usisaon kon paano gamiton ang digital media suno sa paggabay ni Kristo.
Pila sa mga suhestyon sang CBCP amo ang paglikaw sa paggamit sang cellphone antes magtulog kag magbangon, device-free meals, pagbuhin sang social media time, kag kon kaisa ang 24-oras nga digital fast.
Suno sa sulat nga ginpirmahan ni CBCP President kag Lipa Archbishop Gubbert A. Garcera, ang digital fasting makabulig sa pagpadalom sang relasyon sa Dios, pagmentinar sang kalinong sang paminsaron, kag pagpabaskog sang relasyon sang pamilya kag komunidad.
