Natilawan sang Cleveland Cavaliers ang pinakamalala nga pagkapiyerde subong nga season matapos nakabalos ang anay sini nga ginlutos nga Oklahoma City Thunder (OKC), sa iskor nga 134 – 114.
Daw kaangay nga ginbubo sang OKC ang kaakig sini halin sa anay natilawan nga pagka-piyerde sang ulihi nga nag-atubangay ang duha ka NBA best team kun sa diin sa pagtakop pa lamang sang una nga quarter, hawid na sang Thunder ang 17 puntos nga abanse.
Gindugangan pa sa ikaduha nga quarter nga ginpaabot sa 25 puntos.
Ginpilit man sang Cavs nga magbalos sa ikatatlo nga quarter apisar indi pa man sini sarang ang episyente nga opensa sang best Western team. Imbes nga malagas, lalo lamang nga nagtaas ang lead kag umabot pa sa 37 puntos.
Sa sulod lamang sang 29 mins., nahimo ni Shai Gilgeous-Alexander nga makapuntos sang 40 puntos, kaupod ang walo nga assists. Nag-ambag man ang forward sang grupo nga si Luguentz Dort sang 22 puntos sa sulod lamang sang 20 mins. nga paghampang.
Wala sang nahimo ang lima ka Cavs starter sa kaangay nga pag-masaker sang Oklahoma sa mga ini. Mangin ang sharpshooter nga si Donovan Mitchell ang nalimitahan lamang sa walo ka puntos sa sulod sang 21 mins. sang paghampang.
Apang si Darius Garland lamang ang nakahimo sang episyente nga opensa gikan sa Cavs kun sa diin sa sulod sang 24 mins. nga paghampang, nahimo sini nga maka-shoot sang 20 puntos, kalakip ang siyam nga assists.
Kasunod sang amo nga hampang, kapwa hawid sa karon sang duha ka grupo 34-6 nga win-loss record nga kapwa best record sa subong nga season.
