Luyag ni Senator Alan Peter Cayetano ang mas malawig kag mas komprehensibo nga imbestigasyon may kaangtanan sa ginapatihan iregularidad sa mga proyekto sang flood control, imbes nga magpokus lamang sa partial report sang Senate Blue Ribbon Committee.
Ginpahayag ni Cayetano nga indi bastante ang pagtalakay sa nauna nga report kun indi man sini mahibaloan ang kabug-osan nga sitwasyon sang isyu.
Suno sa senador, may risgo nga malimitahan ang imbestigasyon kun ang mangin basehan lamang amu ang draft report nga ginpagwa ni Panfilo Lacson sang Pebrero, nga tubtob subong wala pa napirmahan sang kadam-an nga mga senador agud madala ini sa plenaryo.
“May oportunidad kita nga ayuson ang ginhalinan sang problema, indi lang one-time, big-time,” suno kay Cayetano, samtang gintutokan niya nga mas importante ang pag-usisa sang sistemik nga problema kaysa magdali sa pag-conclude base sa indi pa pinal nga report.
Gin-ako man sini nga bisan nabasa na sang pila ka mga senador ang report, wala pa gihapon sang nagakaigo nga paghangpanay bangud may yara pa sang mga bahin nga kinahanglan himuon nga mas klaro kag mas himayon.
Dugang pa niya, indi ini nagakahulugan nga naga-indikar ang iban nga mamalidha nga indi sila gusto magpirma, kundi may mga detalye lamang nga ginakinahanglan sang dugang nga pagreview.
Sa pihak nga bahin, ginpabutyag ni Cayetano nga padayon pa ang imbestigasyon kag ginapaabot nga may madugang pa nga mga testimonya kag ebidensya sa masunod nga mga hearing.
Ginbanatan man sang senador ang ginapatihan nga sayop nga pag-frame sang isyu sa umpisa, ilabi na ang pagtawag nga “ghost projects” sa tanan nga proyekto, nga sa ulihi gin-ako man nga indi man gali tanan amu sina.
Samtang, ginpabutyag sang Minority Leader nga importante nga makita ang bug-os nga konteksto sang isyu bangud posible ini nga nagapakita sang mas madalom nga problema sa sistema.
