Ginsabat na ni Senador Alan Peter Cayetano ang obstruction of justice complaint nga ginpasaka batok sa iya angot sa pagpalagyo ni Senador Ronald “Bato” dela Rosa sa Senado sang kaagahon sang Mayo 14 suno sa Office of the Ombudsman.
Ginkumpirma sang Ombudsman nga nabaton niya ang counter-affidavit ni Cayetano sang Miyerkules bilang sabat sa complaint-affidavit nga gin-file sang Tindig Pilipinas sang Hunyo 3.
Sa isa ka pahayag, ang anti-graft body nagsiling nga ang counter-affidavit sang senador ginsumite bilang sabat sa nagapadayon nga preliminary investigation sa reklamo nga ginpasaka sang mga katapo sang civil society.
Magluwas kay Cayetano, ang iban pa nga mga respondents sa reklamo amo sanday Senador Robin Padilla kag former Senate Sergeant-at-Arms Mao Aplasca.
Samtang suno sa Ombudsman, wala pa nakasumite sang ila tagsa ka counter-affidavit sanday Padilla kag Aplasca.
Kon ang duha mapaslawan sa pag-file sang ila mga counter-affidavit sa gintalana nga deadline, ang kaso pagakabigon nga “deemed submitted for resolution” kag ang Ombudsman indi na magbaton sang dugang nga mga dokumento ukon mga apelasyon.
