Hugot nga ginpanginwala sang Catholic Bishops’ Conference of the Philippines (CBCP) ang mga posts nga nagalapta sa social media nga gina-endorso sini ang mga kandidato sa pagka-senador para sa palaabuton nga Mayo 12 nga eleksyon.
Nagpahanumdoman si Msgr. Bernardo Pantin, secretary general sang CBCP, nga maghalong kag maid-id nga repasuhon ang mga posts nga ila makita sa nagkalain-lain nga social media platforms.
Ini ang iya sabat sa nagalapta nga huring-huring nga ginaalegar sulat nga ginpirmahan ni CBCP President Cardinal Pablo Virgilio David ang gina-alegar naga-endorso sang pila ka mga kandidato sa pagka-senador.
Ginhatagan pagtamod ni Pantin nga wala sang gina-endorso nga indibidwal nga kandidato ang Simbahan. Sa baylo, nagahatag ini sang moral kag sosyal nga mga pagsulundan sa pagbulig sa mga tumuluo sa ila mga pagpili.
Gindugang sini nga kun may mga pangalan sang mga kandidato nga magguwa sa ginaalegar endorsement sang Simbahan, nagakadapat nga kabigon ini nga peke ukon indi matuod.
Naghingyo ang diosesis sa publiko nga siguraduhon nga matuod ang ginapaambit nga impormasyon kag maghalong sa pagpalapta sang sala nga impormasyon.
