Ginklaro sang Catholic Bishops’ Conference of the Philippines (CBCP) kahapon nga adlaw sang Domingo, nga kabaliskaran ang nagalapta nga espekulasyon, wala sang may ginakabig nga “top contender” sa mga cardinal nga magapasakop sa conclave sa pagpili sang bag-o nga Santo Papa matapos ang pagtaliwan ni Pope Francis.
Suno kay CBCP spokesperson Fr. Jerome Secillano, bisan sin-o sa 135 ka mga cardinal elector ang mahimo nga mapilian basta makakuha sang two-thirds (2/3) nga boto.
Ginsiling sini nga sa pangkabilugan nga kongregasyon sang mga kardinal, amat-amat nila nga hibaluon kon sin-o ang nagakadapat nga botohon, nga wala sang kampanya ukon public frontrunner, nga suno sa iya produkto lamang sang media kag opinyon sang publiko.
Tatlo ka mga Filipino Cardinal ang lakip sa mahimo makaboto nga sanday Cardinal Luis Antonio Tagle, Manila Archbishop Jose Cardinal Advincula, kag Caloocan Bishop Pablo Virgilio Cardinal David.
Gin-athag ni Cardinal David nga bisan indi popular ang isa ka cardinal, mahimo sa gihapon nga pilion ini sang Espiritu Santo bilang bag-o nga Santo Papa, kaangay sang natabo kay Pope Francis.
Pagkatapos nga malubong si Pope Francis, ang “Novemdiales,” ukon siyam ka adlaw nga paglalaw, magasugod antes magsugod ang secretive conclave sa Sistine Chapel. Ang puti nga aso ang igapataas bilang patimaan sang pagpili sang bag-o nga Santo Papa, samtang ang itom nga aso nagakahulugan nga wala sang may napilian.
