Hugot nga ginpanginwala sang Office of the Senate Sergeant-at-Arms (OSAA) ang nagalapta nga impormasyon nga wala sang CCTV footage sa 2nd floor sang Senado may kaangtanan sa insidente sang pagpangluthang sang Mayo 13, 2026.
Suno kay Retired Gen. Mao Aplasca, fully operational na ang CCTV system sang Senado kag narekord ang mga hitabo sa nasambit nga lugar.
Sang Mayo 14, 2026, nakabaton ang Office of the Senate Sergeant-at-Arms sang opisyal nga pangabay gikan kay PCOL John K. Guiagui sang PNP CIDG para sa kopya sang CCTV footage.
Bilang sabat, gilayon nga ginhatag sang Office of the Senate Sergeant-at-Arms ang ginahingyo nga mga kopya sa PNP sa amo man nga adlaw, pinaagi sa ila Integrated Electronics and Technical Section.
Ang mga sertipikasyon kag mga resibo sang pagkilala nagkumpirma nga ang mga kopya sang CCTV matuod, original, kag wala ginbag-o gikan sa opisyal nga sistema sang Senado.
Hugot man nga ginpahayag sang Office of the Senate Sergeant-at-Arms nga ginapamatud-an sang official records nga nagaluntad ang CCTV footage kag nahatag na ini sa mga otoridad.
Dugang pa sang OSAA nga ang pagpalapta sang wala ma-verify nga impormasyon nagapaluya sang integridad sang imbestigasyon, rason kon ngaa nagpanawagan sila nga magsalig lamang sa mga opisyal nga pahayag gikan sa mga otorisado nga ahensya sang gobyerno.
