Ginpahayag sang Office of the Senate Sergeant-at-Arms ukon OSAA nga indi matuod ang nagalapta nga impormasyon nga wala sang CCTV footage may kaangtanan sa insidente sang pagpinalupok sa Senado sang nagligad nga Mayo 13. Suno kay Retired Gen. Mao Aplasca, nagatrabaho sing maayo ang CCTV system sang Senado kag narekord sini ang mga natabo sa lugar.
Sang Mayo 14, nabaton sang OSAA ang opisyal nga pangabay gikan sa PNP-CIDG para sa kopya sang CCTV footage. Dayon naman nga ginhatag sang OSAA sa Philippine National Police ang mga video pinaagi sa ila Integrated Electronics and Technical Section para sa imbestigasyon kag analysis.
Ginklaro man sang OSAA nga orihinal kag wala sang ginbag-o sa mga footage nga ila ginturn-over sa kapulisan. Nagpanawagan man sila sa publiko nga magsalig lamang sa opisyal nga impormasyon agud malikawan ang paglapta sang wala napamatud-an nga mga balita nga mahimo makaapekto sa imbestigasyon.
