ROXAS CITY – Gin-athag sang City Disaster Risk Reduction and Management Office (CDRRMO) nga may yara sang short notice kag koordinasyon sa City Government ang Provincial Disaster Risk Reduction and Management Office natuhoy sa pagpapuli sa mga Locally Stranded Individuals ukon LSI’s nga residente sang siyudad sang Roxas.
Ini ang ginpahayag ni CDRRMO head Dennis Saneo sang mainterview sang Bombo Radyo.
Suno kay Saneo nga tatlo ka adlaw antes nga magpauli ang mga LSI’s nga naka-coordinate na sila sa mga Local Government Units ukon LGU’s agud nga mapreparahan ang tagsa ka mga quarantine facilities sa siyudad.
Ginapahayag nga Agosto 17 sang ginpalab-ot nila ang impormasyon nga may yara sang magapauli sa probinsya apang Agosto 19 na sang nabaton sang City Government ang short notice gikan sa PDRRMO sa pagpanguna ni Capiz Governor Esteban Evan Nonoy Cotreras
Matandaan nga nagpaguwa sang official statement si City Mayor Ronnie Dadivas pinaagi sa iya nga facebook post kun sa diin nagakahangawa ini bangud sa kulang nga koordinasyon kag short notice nga pagpatigayon sang mga special flights sa probinsya.
Mahibaluan nga kapin sa 135 ka mga indibidwal gikan sa Metro Manila ang nagpauli sa probinsiya gikan sa Metro Manila sadtong Agosto 20, 2020.
