ROXAS CITY-Ginsabat sang pamunuan sang City Disaster Risk Reduction and Management Office (CDRRMO) ang mga alegasyon sa ila matapos ang nagluntad nga komosyon sa tunga sang pila ka mga responder sang Roxas City Emergency Response Team (RCERT), tanod kag mga barangay officials sang Barangay Banica, Roxas City sa guha sang Banica Public Cemetery.
Gin-ako ni Mr. Dennis Saneo, Head sang CDRRMO nga wala sila nagkoordinar kag nag-impormar sa barangay nga may yara sila sang inuglubong nga COVID-19 Suspected Case bangud sandig sa guidelines sang DOH, indi man obligado nga mag koordinar ang LGU sa barangay kun may yara sang igalubong nga suspected ukon covid patient.
Gindepensa sini nga bangud may bakante nga lote kag may ginreserba na ang pamilya nga nitso, nadesisyonan nga didto na lamang ilubong ang 58-anyos nga mister nga COVID-19 Suspected Case nga ginbawian sang kabuhi.
Ginpanginwala man sini ang mga alegasyon nga wala nagasuksok sang Personal Protective Equipments (PPE’s) ang mga responder sang RCERT.
Suno sa kay Saneo nga wala sang kamatuoran ang nasambit nga alegasyon bangud tuman ka delikado sa isa ka frontliners nga maglubong sa napatay nga suspected ukon positive case nga wala sang may ginasuksuk sang PPEs.
Apang gin-athag ni Saneo nga ginakakas na sang mga frontliners ang ila ginasuksuk nga mga PPEs sa tion nga matapos ang paglubong kag ginabutang sa isa ka silyado nga suludlan.
Matandaan nga nagtuga sang komosyon sa tunga sang mga katapo sang RCERT kag pila ka mga barangay officials sang Barangay Banica matapos natukiban nga may yara sang ginlubong nga suspect case sa Banica Public Cemetery.
