ROXAS CITY – Wala sang may ginbatyag nga serious adverse reaction ang pinuno sang City Disaster Risk Reduction Management Office (CDRRMO) matapos mabakunahan sang COVID-19 vaccine sa ginhiwat nga kick-off and simulation activity sang CoVid-19 vaccination sa mga frontline health workers sang Roxas City, Marso 19, bernes nga adlaw.
Ini ang ginpakigbahin ni Mr. Dennis “Pong” Saneo sang mainterview sang Bombo Radyo.
Suno diri nga nangin madinalag-on nga mabakunahan ang lima sa ila nga talatapan kag lunsay wala nagbatyag sang serious adverse effect.
Dugang pa sini, normal makabatyag sang kakapoy kag gamay nga paglingin sang ulo pagkatapos mabakunahan, apang makadali lamang ini.
Aminado ini bilang frontliner nga mabudlayan sila sa pag-engganyo sa mga pumuluyo nga magpaturok apang pinaagi sa ila information dissemination kag pagpakita nga safe ang pagpabakuna, kumpyansa ini nga mapaintindi sang maayo sa mga pumuluyo ang importansiya sang nasambit nga bakuna.
Kabigon suno diri nga kontra ang COVID-19 kag mangin panaming ang COVID-19 vaccine.
Nagapati ini nga kun mabakunahan na ang kadam-an sang mga pumuluyo, mangin hilway na ang aton paghulag. Apang, ginklaro niya diri nga indi sa gihapon magpakampante sa virus, sa baylo, maghalong kag ipatuman sa gihapon ang strict health minimum protocol kaangay sang pagsuksok sang face mask, face shield, kag masami nga paghugas sang kamot.
