Naka-heightened alert status ang Roxas City Disaster Risk Reduction and Management Office (CDRRMO) bangud sa posible nga pagbaha kag sa nagahilapit nga selebrasyon sang Kapistahan ni San Juan de Bautista.
Sa interview sang Bombo Radyo Roxas kay Aljessie Alvio, Local Disaster Risk Reduction and Management Office II for operation and early warning sang Roxas City Disaster Risk Reduction and Management Office (CDRRMO), iya ginpahayag nga nakahanda na ang ila deployment plans kag mga personnel nga ibutang sa nagkalain-lain nga bahin sang syudad agud masiguro ang kaluwasan sang publiko.
Suno kay Alvio, hugot man nga bantayan ang mga beach kag kadagatan bangud ginapaabot ang pagdamo sang mga tawo nga magaselebrar sang pista kag magapaligo sa mga baybayon.
Pahayag pa niya, mangin mahinalungon, bantayan ang mga kabataan, kag likawan ang pagpaligo ukon paglangoy kon yara sa impluwensya sang makahulubog nga ilimnon.
Dugang pa sang natungdan, importante nga mangin masadya, malinong kag puno sang paghiliusa kag pagrespeto ang selebrasyon sang Kapistahan ni San Juan sa Roxas City.
