LOKAL — Ginapreparar sang City Disaster Risk Reduction and Management Office ukon CDRRMO sang Roxas City ang deployment plan kag mga preparasyon para sa pagsaulog sang Undas 2026, agud masiguro ang kaluwasan sang publiko kag ang hapsay nga pagdumala sang mga aktibidad sa mga sementeryo kag iban pa nga lugar nga pagadagsaan sang mga pumuluyo.
Sa interview kay Mr. Gilbert Fernando, Acting CDRRMO Head, importante ang pagplano sang deployment sang mga personnel kag ang koordinasyon sa nagkalain-lain nga ahensiya agud mangin handa sa pag-atubang sang mga emerhensiya sa tion sang pagduaw sang mga pamilya sa lulubngan sang ila mga pinalangga nga napatay.
Kabahin sang ginapreparar nga deployment plan ang pagtalupangod sa mga lugar nga posible madamo ang bisita, pagmonitor sa kahimtangan sa palibot sang mga sementeryo kag pagpreparar sang mga personnel nga mahimo magresponde kon may matabo nga emerhensiya. Ginahatagan man sang importansya ang koordinasyon sa traffic management, peace and order, first aid kag emergency response, agud masiguro nga may nagakaigo nga bulig para sa publiko kon may mga insidente nga nagakinahanglan sang gilayon nga aksyon.
Dugang pa, kinahanglan nga may klaro nga koordinasyon sa tunga sang mga personnel sa field kag sang nagadumala sang operasyon agud mapadasig ang paghatag sang impormasyon kag pagresponde sa mga insidente.
