ROXAS CITY – Madamo sang ginlapas nga laye ang Memorandum of Agreement (MOA) nga ginpresentar ni Mr. Hilario Panuncio, isa ka empleyado sang munisipyo sa banwa sang Sapian kasunod sang ginpatigayon nga excavation sa suba kag pag-construct sang illegal dike sa Ibajay River sa Sitio Ibajay, Barangay Agtatacay Sur, Sapian para sa mudcrab project proposal.
Ginpahayag ni Sangguniang Bayan member Jonathan Gallardo nga makabig nga null and void ang nasambit nga MOA, apisar pa nga pirmado ini ni Mayor Arthur John Biñas.
Ini bangud wala nag-agi sa Sangguniang Bayan kag wala sang ginpapasar nga ordinansa nga nagahatag otoridad sa alkalde nga magpirma for and in behalf sa municipal government sang Sapian.
Nagpatigayon man sang onsite inspection ang katapu sang SB sang Sapian sa lugar sa diin ila nakita ang iban pa nga bayolasyon nga nakomiter ni Panuncio sa plano nga pagculture sang mudcrab.
Kalakip diri ang kapaslawan nga makaangkon sang permit ang proyekto, paglapas sa municipal ordinance, conflict of interest bangud ang opisina sa diin nagatrabaho si Panuncio amo man ang naghimo sang project proposal rason nga na-enganyo sini nga magpirma ang alkalde.
Magluwas diri madamo man nga mga mangroves ukon bakhaw ang nagkalasamad bangud sa back hoe nga gingamit sa pag-construct sang dike.
Apang matapos makasumiter sang committee report ang SB kag nakita ini sang alkalde, gilayon nga nagpaguwa sang cease and desist order si Mayor Biñas nga nagapauntat na sa mudcrab project ni Panuncio.
Ginkumpirma man ni Gallardo nga sa ila pag-estoryahanay sang alkalde, gin-ako nga nagpirma ini sa MOA, apang naghinyo nga tapuson na ang isyu bangud nagpapanaug na siya sang cease and desist order.
Sa karon suno kay Gallardo nga wala ini sang plano nga maghimo sang legal nga tikang labi na sa karon nga may ginapangatubang nga krisis ang kalibutan.
