Mangin epektibo ang ceasefire deal ukon kasugtanan sa untat-lupok sa tunga sang Israel kag Hamas sa adlaw sang Dominggo, Enero 19 matapos ang masobra isa ka tuig nga giyera sa tunga sang Israel kag Hamas sa Gaza sumugod sang nag-umpisa ini sadtong Oktubre 7, 2023.
Ini ang una nga phase sang kasugtanan nga magadugay sang anom ka semana ukon masobra isa ka bulan. Sa idalom sang nasambit nga phase, igapatuman ang ceasefire, pag-withdraw sang Israeli forces, pagbaylohanay ukon paghilway sang mga bihag kag priso sa bahin sang Israel kag Hamas kag pagpanagtag sang humanitarian aid sa Gaza. Ginpahayag naman ni US President Joe Biden sang damlag lang nga kalakip sa pagahilwayon ang mga American national nga bihag sa Gaza.
Ang ikaduwa kag ikatatlo nga phase naman wala pa sang maathag nga detalye kag nakatalana nga desisyonan sa una nga phase sang kasugtanan.
Apisar una na nga ginkumpirmar sang nagserbe nga mediators nga Qatar kag US ang ceasefire deal, nakatalana pa lamang nga aprubahan sang Israeli cabinet kag ni Prime Minister Benjamin Netanyahu ang nasambit nga kasugtanan.
Indi man suno diri maghatag pa sang opisyal nga komento si Netanyahu tubtob wala pa na-finalize ang mga detalye sa ceasefire deal.
Sa bahin naman sang Hamas, ginpahayag ni Hamas official Izzat al-Risheq nga natuman tanan nga mga ginplastar nga kondisyon sang Palestinian group sa naistoryahan nga ceasefire deal sa Doha, Qatar kalakip ang full withdrawal sang Israeli forces, ang pagbalik sang mga na-displace nga Palestino sa ila mga puluy-an kag permanente nga pagtapos sang giyera.
Samtang, kasunod sang ceasefire kag hostage deal sa tunga sang Israel kag Hamas, nakahinun-anon ni Prime Minister Benjamin Netanyahu sanday US President Joe Biden kag US President-elect Donald Trump.
Diri ginpasalamatan ni Netanyahu si Biden sa iya nga suporta para mapadasig ang paghilway sa mga bihag kag sa pagbulig sa Israel nga matapos na ang kabudlay sang dinosena nga mga bihag subong man sang ila nga mga pamilya.
Gindayaw naman ni Netanyahu si Trump sa iya nga pahayag nga magabulig ang US sa Israel agud siguruhon nga indi na mangin tiniran sang mga terorista ang Gaza.
Nagkasugot man sanday Trump kag Netanyahu nga magkit-anay sa ulihi sa Washington agud pagahinalaan ang nasambit nga isyu kag iban pa nga bilidhon nga mga butang.
Ginpalig-on man ni Netanyahu ang commitment sang Israel sa pagpasiguro sa paghilway sa tanan nga mga bihag sa tanan nga posible nga paagi.
Samtang, sa dekalarasyon sang ceasefire, nagsaulog ang mga Palestino sa Gaza strip. Pila ang maluha-luha pa sa kalipay, nagapanihol, nagapalakpak kag nagaamba sang “Allahu akbar” nga ang buotsilingon, “God is greatest”.
