Dismayado ang 21-anyos nga tindera sang isa ka bakery sa Hemingway St., Barangay Tiza, Roxas City matapos ginkuha ang iya cellphone sang ila nga kostomer nga nagabakal sang pandesal.
Wala naghuna huna ang tagreklamo nga si Rea Rose Catimbang sang Barangay Lonoy, Roxas City nga interesan sang ila kostomer ang cellphone bangud nabutang ini malapit sa ila bentahan.
Ba-se sa panaysayon ni Catimbang may lalaki nga naka-motor nga nagbakal sang P20.00 nga pandesal.
Nagtalikod sa makadali ang tagreklamo agud magkuha sang pandesal kag sang iya gindaho ang ginbakal nga pandesal sang kostomer, hinali ini nga nagdalagan pakadto sa motorsiklo kag ginpaburhot ang motor.
Didto nadiparahan ni Catimbang nga wala na ang iya cellphone nga nagabalor sang P18,000.
Ginlagas pa ang suspek sang isa ka tricycle driver nga nakabati sa pagsinggit sang tagreklamo, apang wala na maabtan bangud sa madasig nga pagpadalagan sang motorsiklo. Nag-apelar naman si Catimbang sa nagkuha sang iya cellphone nga kuntani maluoy man sa iya kag ibalik na lamang ini.
