ROXAS CITY – Ginkasubo sang pinuno sang City Environment and Natural Resources Office (CENRO) ang paglapta sang laragway sang isa ka citation ticket kun sa diin nakasaad ang sala nga spelling ‘hilmate’ sa baylo sang helmet.
Sa interview sang Bombo Radyo kay Mr. Ronald Amigo, ginsiling sini nga sa baylo nga dayawon ang mga miyembro sang CORE unit bangud sa maayo nga binuhatan agud mapatuman ang ‘No Helmet, No Driving Ordinance’, ginpost pa sa social media ang gamay sini nga sala bangud lamang sa spelling.
Suno diri, kuntani gin-disregard na lang ang gamay nga sala kag ginsentro na lang sa maayo nga tinutuyo sang CORE unit nga serbisyuhan kag protektahan ang pumuluyo.
Kaangut diri, nagalaum si Amigo, nga indi na matabo liwat ang kaangay nga insidente kag sa baylo i-appreciate na lang ang ginahimo sang CORE unit agud mangin matawhay ang syudad kag nagasunod sa layi.
