ROXAS CITY – Nagapadayon ang enumeration period para sa 2020 Census of Population and Housing sang Philippine Statistics Authority (PSA) sa probinsiya sang Capiz.
Ini ang ginkompirmar ni Engr. Frankie D. Dordas, Provincial Statistics Officer sang PSA-Capiz sang mainterview sang Bombo Radyo.
Suno kay Dordas nga apisar nagapangatubang ang pungsod sa COVID-19 pandemic padayon sa gihapon ang pag-enumerate sang mga enumerators sa tagsa ka mga kabarangayan sa mga households kun sa diin ginasunod sa gihapon nila ang ginapatuman nga mga health protocols.
Ini agud luwas ang mga enumerators sa pagpatigayon sang survey kag mga residente nga ila pagakuhaan sang impormasyon.
Ginpahayag ni Dordas nga nagasuksok man sang mga face mask, face shield kag alcohol ang ila mga enumerators bilang parte sang paghalong.
Samtang ang mga households nga indi naman makapatigayon sang face to face interview ang mahimo ipaagi na lamang sa pag-fill up sang survey form ukon pagtawag sa telephone ukon cellphone number kag pinaagi sa pagsabat online sa PSA website.
Mahibaluan nga nagsugod ini sadtong Setyembre 1, 2020.
