ROXAS CITY – Nagpasalig ang legal counsel sang gina-alegar CEO sang 25 days double your money investment scheme, nga handa nga ibalik sang iya kliyente ang investments sang mga investors.
Ini ang ginpahayag ni Atty. Vicente Atlas Catalan sang mainterview sang Bombo Radyo.
Suno kay Catalan nga gintuad sang iya kliyente nga si Junelyn Gregorio nga isa sa mga rason nga wala sang pay-out ang mga investors bangud may isa ini ka upline nga wala gina-remit sa iya ang mga investments sang mga investors.
Apang nagpamalibad lamang ini nga ipalayag ang pangalan sang amo nga upline, bangud mas maayo nga may ginauyatan na sila nga listahan nga magaserbe nga ebedensiya sa ila nga mangin statement.
Ginsuguran na sa karon sang hubon ang pag-account, voucher kag counter checking sang pila ka mga dokumento sang investors agud mapadasig man ang proseso.
Sa karon indi pa mapat-ud ang kantidad nga dapat ibalik sa mga investors bangud padayon pa ang pagtsekyar sa mga lehitimo nga mga investors.
Ginapanindugan man ni Catalan nga wala nagpalagyo ang iya mga kliyente bangud nagapabilin pa ini sa probinsiya kag ginaproseso ang kinahanglanon nga mga papeles.
Handa man nga atubangon ni Gregorio ang kaso nga ipasaka sa iya, apang sa karon ginahimud-usan sang iya kliyente nga mabalik ang investment sang mga investors, agud indi na maglab-ot sa pagkasuhay.
Samtang ginpanginwala ni Catalan ang alegasyon nga sa iya opisina sa kapitolyo probinsyal naga-pay out ang pila ka mga investors.
Ginpanindugan man sang abogado nga wala ini sang personal nga koneksyon sa nahinambitan nga investment scheme.
Ginklaro man sini nga nagkakilala sila ni Gregorio sadtong 2017 matapos nga ginkuha ang iya serbisyo sa iya mga negosyo sa syudad sang Roxas.
