Indi magpangduha duha nga maghimo sang legal nga tikang ang pila ka mga team leader sang RGS World Marketing Corporation batuk sa pamunuan sini pananglitan nga indi pagtumanon ang ginpasalig nga pull out of investments sang mga investors.
Sa pagpakig-angut sang Bombo Radyo sa isa ka team leader sa syudad sang Roxas nga nagpadulong sa talatapan sang RGS World Marketing Corporation sa Bacolod City, ginpasiguro sini ang ila pagpasaka sang complaint sa CEO sang kumpaniya nga si Rodolfo Garcia Salarda,kun mapaslawan ini nga mabalik ang investment.
Ginpahayag sini nga nagtenir man ini sadto sang isa ka semana sa syudad sang Bacolod sang bulan sang Marso apang nagpauli sa Capiz matapos nagpaguwa sang memorandum ang talatapan nga magasugod sila sa pagproseso sa pagpull-out sang investments sa ini nga adlaw.
Ginkumpirma sang Team Leader ang ila komunikasyon ni Salarda sadto sa diin katapusan nila nga kontakanay sang Abril 5, 2021.
Suno diri nga naghinyo pa sa ila si Salarda nga matipon sila anay sang sales nga amo ang ila gamiton sa pagbalik sa investment sang mga investors.
Ang kaundan sang ila pag-estoryahanay ni Salarda ang direkta sini ginapalab-ot sa mga investors nga nagsalig nga mabalik ang ila investment.
Apang sa karon indi na makontak si Salarda nga naghatag sang kaakig sa mga investors nga iya ginpromesahan.
Ginpahayag sini nga nagalaum gid ang mga investors nga yara sa iya team nga dala na sini ang ila investment sa pagpauli sa Roxas City.
Nahibaluan nga sa team pa lamang sini may kapin sa P50 million ang ila makuha nga investment.
