ROXAS CITY – Nangin madinalag-on ang ginpatigayon nga COVID-19 ceremonial vaccination sang mga medical health workers sang Roxas Memorial Provincial Hospital.
Ginpangunahan sang tatlo ka mga doktor nga sanday Dr. Edmarie Tormon, OIC Chief of Hospital sang RMPH, Dr. Ernestine Urquiola kag Dr. Ma. Consolacion Botin ang pagpabakuna sang Sinovac vaccine kag ginsundan sang iban pa nga mga medical frontliners sang RMPH.
Sa pagpakig-angut sang Bombo Radyo kay Dr. Urquiola, ginpahayag sini may nabatayagan nga gamay nga sakit, apang normal lamang ini bangud sa dagum nga ginpasulod sa panit.
Suno naman kay Dr. Alex Nolasco, OIC head sang Provincial Health Office-Capiz nga matapos mabakunahan ang mga medical health workers, ginadalasila sa isa ka area kag obserbahan sang 30 minutos agud masiguro kun may advserse effect ang nasambit nga bakuna sa ila lawas.
May instruksyon man ang gobernador nga gamiton ang tanan nga bakuna nga ginpadala sang regional office sang DOH sa mga medical frontliners sang RMPH kag wala sang may ibilin.
Matapos ang 1st dose sang Sinovac, bantayan naman ang pag-abot sang ikaduha nga batch sang amo nga bakuna sa probinsiya.
Samtang tuman ang pagpasalamat ni Governor Esteban Evan Contreras II bangud nalakip ang probinsiya sa mga nakabaton sang Sinovac vaccine sa Western Visayas.
Ginpasiguro sang gobernador nga matapos ang RMPH, masunod nga magabaton sang vaccine ang mga district hospitals kag pribado nga ospital.
