ROXAS CITY – Indi kumbinsido ang chairman sang Roxas City Fisheries and Aquatic Resources Management Council ukon CFARMC sa ginpatigayon nga imbestigasyon sang City Council nga oil spill ang gintunaan sang fish kill sa mga fish cages partikular na sa Cadimahan River, Barangay Culasi, Roxas City.
Ini ang ginpahayag ni Mr. Ronilo Combate, chairman sang CFARMC sang mainterview sang Bombo Radyo Roxas.
Suno kay Combate nga wala ini nagapati nga oil spill ang gintunaan sang fish kill sa mga kasubaan.
Ginpahayag man ni Combate nga indi dapat pag-ibasol nanday City Councilor Moreno Moring Gonzaga sa mga illegal settlers, mangingisda ukon magagmay nga mga sakayan nga ginapahayag nagalimas sang tubig nga may lakot sang oil ukon langis sa mga kasubaan.
Dugang pa sini nga posible isa sa mga gintunaan sang fish kill amo ang mga chemical ukon basura nga nagahalin sa drainage ukon sa mga establisyemento partikular na sa mga talyer nga dala sang tubig baha kag nagadiretsu sa mga kasubaan.
Magluwas diri, may yara man sang mga dalagkuan nga mga barko nga nagadungka partikular na sa Culasi Port kun sa diin lipod sa ihibalo sang tanan nga nagaula man sang langis sa baybayon.
Nagpanindugan naman si Combate nga kun mahimo hibaluon anay sang maayo sang konseho ang gintunaan sang nasambit nga problema sa mga kasubaan antes magdihon sang nagakaigo nga ordinansa.
Mahibaluan nga magadihon sang ordinansa ang konseho sang siyudad kun sa diin may yara sang nagakaigo nga penalidad ang sin-o man nga magahalit sa mga kasubaan.
