ROXAS CITY, CAPIZ – Nagpanawagan ang Roxas City Fisheries and Aquatic Resources Management Council (CFARMC) sa Roxas City Government nga pamatian kag seryosohon ang ila rekomendasyon nga unahon ang dredging kag pagpalapad sang mga kasubaan bilang mayor nga pamaagi agud masolusyonan ang pagbaha.
Sa interview sang Bombo Radyo kay Ronilo Combate, Chairperson sang nasambit nga organisasyon, iya ginpahayag nga naganabaw kag nagakipot na ang mga suba rason kun ngaa indi na maayo nga maka-ilig ang tubig padulong sa dagat.
Kun may mabaskog nga ulan suno sa iya, nag-aawas ang tubig nga amo ang rason sang pagbaha sa madamo nga lugar.
Pahayag niya, indi dapat nga drainage system lang ang tutukan bangud apisar ano pa ka moderno sang drainage, indi gihapon ini epektibo kun ang baba sang suba manubo kag kipot.
Ang mas importante amo ang pagpalapad sang suba, pagpadalom sini pinaagi sa dredging, kag pagkakas sang mga istruktura kag fish cages nga nagapugong sa normal nga dalagan sang tubig.
Dugang pa ni Combate, may impluwensya ang pila ka tag-iya sang fish cages sa palibot sang suba nga naga-contribute sa pagkipot sini kag nagabalabag sa natural nga pag-ilig sang tubig.
Ang ini nga sitwasyon suno sa iya ang nagakinahanglan sang matuod-tuod nga political will halin sa lokal nga mga lider agud ma-impose ang clearing kag pagsunod sa mga fishery laws.
