ROXAS CITY – Hugot nga ginakundenar sang chairman sang Commission on Higher Education (CHED) ang nagalapta nga reports gikan sa mga student groups nga ginabasol ang tagdumalahan kag mga manunudlo sang Capiz State University (CAPSU) sa pagkamatay sang isa nila ka estudyante nga si Cristelyn May Villance, 2nd year criminology student sang CAPSU Dumarao campus sadtong Mayo 14, 2020.
Ba-se sa ginpaguwa nga official statement ni Prospero E. De Vera III, gingamit lamang sang mga student groups kasubong sang Samahan ng Progresibong Kabataan (SPARK), Anakbayan UP Diliman kag National Union of Students of the Philippines (NUSP) ang nasambit nga issue para mapalayag ang ila nga pagpamatuk sa ’flexible learning’’ sa diin gina-angut nila ang insedente sa pagpati nga insensitibo ang CHED sa mga request sang mga estudyante.
Suno kay de Vera nga pilit nga ginapaguwa sang nasambit nga mga grupo nga nagapangita sang internet connection ang biktima para masumite ang requirements sa iya nga subjects sang wala ginalauman nga maaksidente ang ginasakyan nga motorsiklo.
Nagapati man ang grupo nga indi matabo ang aksidente nga magaresulta sa kamatayaon ni Villance kun wala ini nagguwa sa balay para magpangita sang internet connection.
Nagpanawagan ang komisyon sa grupo nga SPARK, Anakbayan UP Diliman, NUSP lag iban pa nga grupo nga untatan na ang paggamit sa isyu bilang propaganda sa ila nga political agenda.
