ROXAS CITY – Nagpaathag ang chairman sang Committee on Infrastructure sang Sangguniang Panlungsod sang Roxas City natuhoy sa estado karon sang napaiway nga road construction sa San Roque Street, Barangay Inzo Arnaldo, Roxas City.
Una diri, ginklaro ni City Councilor John Paul Arcenas ang matuod nga rason sang pagpauntat sang amo nga proyekto.
Suno sa konsehal nga ginpakamaayo ni City Mayor Ronnie Dadivas nga pauntaton anay ang amo nga proyekto matapos nahibaluan nga wala pa matapos ang una nga proyekto sang amo nga kontraktor sa Barangay Dayao nga ginareklamo sang mga pumuluyo.
Kasunod diri ang pagpa-require sa amo nga kontraktor nga tapuson ang konstruksiyon sang dalan sa Barangay Dayao kag makasumiter sang construction permit sandig sa City Ordinance 046-2016.
Sa pagpangusisa ni Arcenas nahibaluan sini nga nahimo naman sang kontraktor nga masumiter ang mga rekisitos kag sang gintuad man sa iya sang tag-iya nga si Gin Arabia nga natapos na ang pagkaayo sang dalan sa Barangay Dayao.
Bangud diri suno kay Arcenas, kinahanglan na lamang nga ma-validate sang Department of Public Works and Highways (DPWH) ang proyekto sa Barangay Dayao kun matuod nga natapos na ini antes masuguran liwat ang pagkaayo sang dalan sa San Roque Street.
Kumbinsido man si Arcenas nga isa man sa rason sang pagkaatrasar sang amo nga proyekto ang ginapangatubang sa karon nga pandemiya.
Nagpanindugan man ini nga wala sang pagpang-ipit ukon pamulitika sa pagpauntat sang amo nga proyekto kag ginasunod lamang nila kun ano ang nagakadapat nga himuon kag nasandig sa ordinansa.
Nagalaum man si Arcenas nga gilayon na nga mapadayon ang pagkaayo sang dalan sa San Roque Street agud matapos na ang houl nga tuga sang guba nga dalan sa mga pumuluyo.
