ROXAS CITY – Ginplastar sang chairman sang Committee on Transportation and Public Utilities sang Sanguniang Panglungsod ang ginapropose nga bag-o nga ordinansa natuhoy sa renewal sang franchise sa mga tricycle.
Suno kay City Councilor Atty. Albert Gregore Potato nga himu-on na nga tatlo ka tuig ang pagparenew sang franchise.
Ginklaro sini nga may dugang nga balayran sa pagrenew apang minimal lamang ang gintaas kag may yara sang mga requirements nga gindugang sa pagrenew sang franchise.
Mahimu na nga mangin transferrable ang franchise sa malapit nga himata sang tag-iya ilabi na kun nagtaliwan na ang nakarehistro nga pangalan.
Ginbawalan naman sa bag-o nga ordinansa ang multiple franchise nga ginahimu na nga palangabuhian sang iban nga mga operators.
Gindugang ni Potato nga kinahanglan magpresentar sang affidavit ang isa ka operator nga siya ang residente sang Roxas bangud madamo sang natukiban si Potato nga botante lamang sang Roxas ang isa ka operator apang nagapauli ini sa pila ka mga banwa sang probinsya sang Capiz.
Target ni Potato nga mapapasar ang nasambit nga ordinansa antes magtakup ang tuig agud hugot agud nga mapatuman na ini sa Enero 2020.
May yara naman sang penalidad ang mga operators nga madakpan nga wala nagasunod sa ordinansa.
Gin-athag ni Potato nga paborable ang tanan nga provisions sang nasambit nga ordinansa sa mga tricycle operators and drivers.
