Temporaryo nga i-suspend ang ginapatigayon nga checkpoint sang Philippine Army sa banwa sang Barangay Jaena Norte, Jamindan, Capiz matapos ang reklamo sang pila ka miyembro sang Panay Bukidnon Indigenous Cultural Communities.
Sa interview sang Bombo Radyo kay Capiz 2nd District Board Member Gilbert Ardivilla, Chairman sang Committe on Laws, Good Governance, Justice and Human Rights iya ginpahayag nga nagpatigayon sila sang isa ka public hearing kaupod ang pila pa ka mga miyembro sang Sangguniang Panlalawigan sang Capiz.
Suno kay Ardivilla, may mga alegasyon sila sang pagpangharass kag pagkumpiskar sang ila mga produkto, lakip ang pagdakop kag pag-impound sang motorsiklo kag pagkumpiskar sang 50 ka sako sang bugas.
Bangud sini, nakabatyag sang kahadlok ang mga nagreklamo bangud sang posible nga epekto sang insidente sa ila pagpangabuhi gani ginhingyo sang mga miyembro sang Panay Bukidnon ang imbestigasyon sa natabo, proteksyon para sa ila komunidad, kag mas maayo nga koordinasyon agud malikawan ang pareho nga insidente sa palaabuton.
Dugang pa sang natungdan, ila nga tinguhaan nga mahatagan sang solusyon agud mag-angkon sang katawhayan ang mga indigenous people sang probinsya.
