Isa ka kadalag-an ang gindala ni SFO2 Sussie May L. Magan, Chief sang Community Relations Unit sang Roxas City Fire Station, matapos ini makilala bilang isa sa awardee sa 3rd Asia’s Top Women Awards.
Sa interview sang Bombo RAdyo kay Magan, iya ginpahayag nga daku gid ang iya nga pagpasalamat sa pagkilala sa iya.
Suno sa iya, wala gid niya ginalauman nga makabaton siya sang nasambit nga kadungganan nga indi lang para sa iya kundi sa tanan man nga katapo sang Bureau of Fire Protection.
Ang pagkilala kay Magan nagapakita sang iya padayon nga dedikasyon, kahibalo kag kahusayan sa pagpangulo, lakip na ang iya sinsero nga pagserbisyo sa publiko.
Partikular nga ginakilala ang iya kontribusyon sa pagpalig-on sang kahibalo kag kahandaan sang komunidad tuhoy sa fire safety kag disaster preparedness.
