Nag-file sang diplomatic protest ang China batok sa Pilipinas kasunod sang komprontasyon sa Ayungin Shoal sang Hulyo 20.
Sa regular nga press briefing sang Chinese Foreign Ministry, ginpahayag ni spokesperson Foreign Ministry Lin Jian nga pormal nila nga gin-file ang protesta sa embahador sang Pilipinas sa Beijing.
Ginpanindugan ni Lin nga nagapatigayon lang sang “routine law enforcement activity” ang China Coast Guard sa palibot sang Ayungin Shoal sang nagpalapit ang duha ka sakayan gikan sa BRP Sierra Madre kag nagbunggo sa isa sa ila mga sakayan pandagat.
Gin-akusahan man sang China ang mga tinawo sang Pilipinas nga mapintas nga nag-atake sa mga tinawo sang Chinese Coast Guard rason nga nagsabat sila sa “malig-on apang legal nga paagi.”
Ginpabutyag man liwat sang China ang ila pag-angkon sa Ayungin Shoal, nga ginatawag sini nga Ren’ai Jiao, kag nagpanawagan sa Pilipinas nga kuhaon ang BRP Sierra Madre nga nadestino sa lugar halin sang 1999.
Ginpakamalaut man sang pila ka mga mamalidha kag mga opisyal sang gobyerno ang ginsiling nila nga pagtinguha sang China nga ipakita ang kaugalingon bilang biktima sa amo nga insidente.
